काठमाडौं । किसानहरुलाई आवश्यक रासायनिक मल प्रशस्त उपलब्ध गराउने सोच सरकारले बनाएपछि खासै त्यसको प्रभावकारिता भने भएको देखिँदैन । विगतका वर्षहरु भन्दा यस वर्ष रासायनिक मलको समस्या नदेखिएको भएपनि किसानहरुले सहज रुपमा मल पाएको भन्ने भने होइन । सरकाले किसानका लागि अनुदानमा उपलब्ध गराउँदै आईरहेको रासायनिक किसानसम्म नपुगि बाटोबाटै हरायो भन्दा अचम्म पनि लाग्न सक्छ । तर अचम्म मान्नु पर्ने कारण भने देखिएको छैन ।
वाँकेमा त्यस्तै नै भएको छ । संघीय सरकारले अनुदानमा वाँकेको नरैनापुरका किसानका लागि भन्दै पठाएको १ सय ३० बोरा रासायनिक मल बाटोबाटै हराएपछि खल्लीखल्ली मच्चिएको छ । बाँकेको नरैनापुर–५ मटैयास्थित राप्ती कृषि सहकारी संस्था लिमिटेडले पाएको पठाएको एक सय ३० बोरा मल बाटोबाटै गायब भएको पछि अहिले मलको अर्को काण्ड दोहोरिएको छ ।
बाँकेका प्रमुख जिल्ला अधिकारी श्रवणकुमार पोखरेलले दिएको जानकारी अनुसार नरैनापुरका किसानका लागि कृषि सामग्री कम्पनीबाट गत माघ ९ गते बुझिलिएको ५० किलोको दुई सय बोरा हराएको छ । उक्त अनुदानित युरिया मलमध्ये सहकारीको गोदाममा ६४ बोरा मात्रै फेला परेको बाँकेका प्रमुख जिल्ला अधिकारी श्रवणकुमार पोखरेलले जानकारी दिए ।
उनका अनुसार छ बोरा मल स्थानीय किसानलाई बिक्री गरेको भर्पाई पेस भएको छ भने बाँकी हुनुपर्ने एक सय ३० बोरा युरिया मल बाटोबाटै गायब भएको छ ।
उक्त सहकारीले प्रचलित कानुनविपरीतको कार्य गरेको पाइएकाले उपभोक्ताहित संरक्षण ऐनबमोजिम रु दुई लाख जरिवाना गरिएको प्रजिअ पोखरेलले बताए । अहिले गोदाममा भएको ६४ बोरा अनुदानित मल सिल गरिएको छ भने गायब भएको एक सय ३० बोरा मलबारेमा सात दिनभित्र स्पष्टीकरणसहित उपस्थित हुन निर्देशन दिइएको छ ।
अनुदानको मल तोकिएको सहकारीमार्फत तोकिएका क्षेत्रका किसानले पाए नपाएको सुनिश्चित गर्न जिल्ला प्रशासन कार्यालयका सहायक प्रमुख जिल्ला अधिकारी लालबहादुर गुरुङको नेतृत्व टोलीले आकस्मिक अनुगमन गरेको हो ।
स्रोत : Kirshi Online
